Fable: The Nine Brothers in Igala

Ọhiala abo Igala

Amomaye Mẹla

Ọhiala mi kwo kwakwakwa, i lewa n'oji amọmaye mẹla.
 

Amọmaye mẹla ki dẹ-i, ata ma 'fanya la ñwu ma ku ma nẹ ny'oko. E-i kekele efu ma, i n'anya n. Obukọ owñ anẹ ny'oko. Ichẹwñ ki le w'iko k'aikọ akọ̣ inajọ, ma kakini, "Ananya obukọ ki na dọgba alo oo."

Taku ọma kekele m'obukọ-wñ du. I chanẹ eñwa obukọ-wñ, kẹtukẹtu mẹẹ, kẹtukẹtu mẹẹ!

Ichẹwñ ki d'ejọna achabalẹ, abe-i ki n'anya-i rule le gwudu fiaa. Ma lewefu aji, ma f'omi ku ma amọ kpa ny'ọcha, taku amanya f'omi lẹ bu chaka. E-i ki n'anya obukọ-i, i lewaji, omi i ñọ nyọ ki akpa ny'ọcha e-i-wñ gẹ n.

I muda che n'oka efu amọmaye e-i ki an'obukọ k'ejumomi-wñ achoo. I f'omi e-i-wñ kpa lẹ, i fe-i ọmaye-wñ kpa maja eti omi ọmọ.

Ichẹwñ ku ma kw'oko, ma le bọọ tẹ, todu obukọ neke hianẹ n. Oko ma che jiji nana. I leki wunyi, ọjọ du.

Abu k'ọla ki dẹ-i na wọ iye-wñ, i kwo tejubi oko araku. Tak'i lewa f'ẹrẹ kọ anagbo oji. Oñ anagbo kakini, "He hee! Ẹnẹ kọma-wñ ma n'anya n, aku i arọ?"

Taku iye ka ñwu kakini, "Uwẹ agba! owñ ma ni dẹ."

Taku anagbo ka iye lẹ kakini, "Uwẹ m'ọbẹ du, ku wẹ f'ọgba ọgọlọ wẹ meji da, k'amachichi ki wa jẹ ikete-wñ, kẹ m'ọwọ ugbanẹ du kẹ du kpa amachichi lẹ nyefu ẹwñ, kẹ fu dẹ nyọnyọ. Ẹ m'omu du tọ, kẹ nya gwuu eti aji ki ch'okokolo lẹ. Amẹla ki awa momi lẹ, ẹ m'achichi kẹ dẹ lẹ bu-ñwu ma ree. Ẹ ka ñwu ma kakini, "Ẹla ki neke rule, ki m'otihi-wñ du ch'omi, k'otihi-wñ le ki gbẹ, ki fule ra lomi-i daka onu mẹta, ki m'otihi-wn du gwo ọgọlọ mi ki chagbe-i, i lewa, u m'ọgbaluka achichi-i du ñwu jẹ chaka."

Ẹwñ duu k'anagbo ka ñw'iye, iye le teke che chaka.

Ẹla duu ki m'otihi-wñ du chomi, i le ki rule l'omi-i daka onu ka, otihi-wñ gbẹ. Amẹla duu deke che gboogbo, ma neke che n.

Taku ọchachakolo lewa. I m'otihi-wñ du chomi. Aji k'amẹla ki bọ rule loo daka onu ka k'otihi ma gbẹ, ọchachakolo m'otihi-wñ du chomi, i rule l'omi lẹ daka onu mẹla, otihi-wñ gbẹ n. Taku i m'otihi-wñ du gwo ọgọlọ iye-i. Agbe ki d'ọgọlọ iye-i, i biẹ.

Taku iye-i m'ọgbaluka achichi lẹ du ñwu ki lọ. Abu k'ọchachakolo lẹ n'achichi lẹ alọ, iye-i m'ọbẹ du t'una. I m'igba-wñ le rinyọ. Taku i m'iku du tọ ọfa. Oñ i gwọnyu iku-wñ, i mudu wunyi. I mudu dago ugbo k'amọma-wñ akanya ma ro jọ.

Abu k'ọma-wñ ki anaya obukọ kw'oko wa odu, i ka ñwu kakini, "Uwẹ anẹ obukọ ny'oko gẹ no. Anya wẹ lẹ dẹẹ." Taku i m'ọchachakolo du koji obukọ ñwu ọma-wñ.

Adiko ku ma aka ñwu anaya obukọ ki dọgba lẹ lewa, ma kakini, "Ananya obukọ ki dọgba oo."

Taku ọma-i dohi kakini, "Anaya obukọ dọgba eñini gẹ noo."

Ọjọ muñwa gbadaga, amọmaye-wñ m'anya ma ko, ma le gbogbo w'ukpẹreji ulẹ oko lẹ. Taku ọma-i m'ọchachakolo-wñ du, i moji-wñ gwu. Ọchachakolo chanẹ erule. I lale gw'amọmaye-wñ du fiaa. I lew'efomi. I f'omi ọmaye-wñ ki akpomi e-i-wñ gugu ñwu kwoubi lẹ kpa ñwu.

Ma deke che abalẹ gboogbo, ọmaye-wñ e-i ogijo-i, i m'ọchachakolo-wñ-i tu kwugbo ku ma du ro lẹ. I mu da adago oji ameija ki arogu jọ lẹ. Taku ọchachakolo-i deke ta kputukputu, ura mu danyu ẹrẹ. Taku i le tefu ọjegwu.

Abu k'ọma-i le wugbo anya-wñ ki ma li n, i deke raku gboogbo. Taku i kakini, owñ adọla-wñ tef'ura ugbo k'anya-wñ tọ-i. Taku i f'ọla-wñ rọ tef'ura lẹ. Taku i mu tu dufu tefu ọjegwu.

Taku onu egu kakini, "Ewñ ẹ ẹtene?"

Taku i kakini, anya-wñ owñ atene-i.

Taku onu egu kakini, "Amanya d'oko ijẹ ta. Ẹgba duu k'amanya moji da, ẹ mejuma e-i wẹ, kẹ mudu alo."

Abu k'amanya doji kw'oko ijẹ, i mejuma anya-wñ. I m'anya-wñ du, i mu dabi wa ilẹ.

Ọjọñwa-wñ ma alo toko alu ku ma ale kwoubi lẹ, anya ọmaye-wñ e-i ogijo lẹ, i leku. I ñọ n'anya ki anẹ gẹ n. Taku i mu d'ẹnẹ ọbata kpai ẹnẹ achukata tefu amokekele-wñ ki bọ.

Ẹwñ ki chi ki ma nyọ k'onẹ ki biẹnefu ñwu ọmaye-wñ ni lẹ dẹẹ. Ẹwñ k'Ọjọ che ñw'onẹ chojoji ojoji. Alu ki yẹni e-i wẹ ki dẹ, owñ che-i wẹ.

O̩lO̩jo ño̩ kabale̩ ge̩.

“Unyi ekeji we̩ ki ny'eju ke̩ ne̩ n. O̩ya ekeji we̩ ki ny'eju ke̩ ne̩ n. I che̩ka ch'adu-wñ onobule̩, abe̩ ke-i o̩ne̩ke̩le̩, abe̩ k'okuno̩-wñ, abe̩ k'o̩ke̩ke̩te̩-wñ, abe̩ k'e̩wñ duu k'ekeji we̩ ne̩, i ki ny'eju ke̩ ne̩ n.” Akwodufu 20:17 

"E̩wñ ku me̩ ne̩ abajo̩i ki bu me̩ jo̩." Abo Hibru 13:5